't Kwekkerte nuujs vanne Boekoel!
Teun I - Nuuje Jeugprins van De Kuulköpkes
Geplaatst op: 17-01-2024 door Kim Vervoort
In eine volle Kuulköpkespool is Teun I (Thissen) oetgerope es 59e veurgenger van de jeugvastelaovindj oppe Boekoel.
Teun is 11 jaor en woont wie ’t eigelijk heurt mit eine prins in ein kesjteel(-boerderie). Teun is gebaoreen getaoge op de Spick. Hae is de broor van Lot en Krit. En de zoon van Aad Prins Thijs I en Mieke Thissen. In 't dagelijks laeve duit ziene pap medische apparate ontwikkele biej Fortimedix. Zien mooder werk es ambulant deensverlener biej Taalbrug Junior op versjillende bazessjole in de regio.
Teun voetbalt biej DES JO12-2 en sjpeelt d’r op vriejdigaovindj trompet biej BoeZjwa(jeughermenie). Daonaeve haajt d’r d'r van om op ziene tied te vèsse en knommelt hae wel ins innewerkplaats.
Es adjudante haet Teun gekaoze veur Matthijs (Seegers) en Stijn (Thomassen). Ze gaon regelmaotigmitein op paad, voetballe same bej JO12-2 en zitte in groep 7-8 op de bazessjool St. Theresia te Boekoel.
Teun I geit regere mit de sjpreuk:
"Veur gaon door!"
Link nao Prinsesjlager:https://youtu.be/u6BRyayBFbw?si=Nm9u5XxlSBG1Xnne
Hoeskwakers Prins Sven I
Geplaatst op: 15-01-2024 door Kim Vervoort
Tiedes ’n super sjoon gezellig Hoeskwakerbal op vriejdig 12 jannewarie is Prins Sven I oetgerope es 17e veurgènger van de Hoeskwakers.
Sven Rosbender is 16 jaor en woont sinds 2017 oppe Boekoel. Hae zit in zien ekzamejaor vanne Havo, en in ziene vrieje tied is d’r te vinje biej Jong Nederland in Zjwaame en sjuut d’r gaer ‘n pielke biej handjbaogvereiniging Soranus.
Es groot Roerdassenfan waas ’t natuurlik vèt gaaf dèt die höbbe opgetraoje deze aovindj.
Same mit zien Appie Hein en sjportsjool mattie’s Bram en Jeroen es adjudanten geit ‘dit sjone trio veurop’ mit de sjpreuk:
“Mit dees daag is ’t altied raak”
Kwekkerte prins Rochér Lamers
Geplaatst op: 07-01-2024 door Kim Vervoort
Zaoterdig 6 jannewarie waerde Prins Rocher I oetgerope es nuuje veurgenger bie c.v. De Kwekkerte Boekoel. Naodet prins Dave I waas aafgetraoje en opgenaome biej de Aad-prinse, waerde achter de buun de nuuje veurgenger in ‘n nuuj prinsepak gesjtaoke en gierde de zenuwe lètterlik de pan oet.
Wie Prins Rochér I einmaol oetgerope waas en zien zenuwe ‘nbietje gezak wore, maakte hae bekind det hae kómmendsezoen mit merleefs 3 adjudante door het vastelaovessezoengeit. Bjorn Peters, Esli Vencent en Wouter Vergoosen zólle ‘m dit jaor biesjtaon in zien prinssjap.Allemaol Boukoulse jónges die of jeugdprins gewaes zin of biej de Prinsekepel gesjpeeld höbbe. Nao 20 jaor biejein te zin woont Rochér I óngertösse 1x11 jaorsame op de Boukoul mit zien maedje Laura Hul. Same zin zie greutse eljers van zoontje Dani en dochter Fay. Twee echte Kuulköpkes. Zien sente verdeend Rochér es Operations manager biej de firma Helichem in Belfeld. Foetballe biej Boekoel 3 en mountainbike op zónjigmorge zin zien hobby’s.Óm vervolges aaf te sjloete mit eine gooje pot beer.
Zónjig 4-2-2024 vanaaf 13.44 oer is de prinsereceptie veur Prins Rochér I en zien adjudante in de Kwekkertepool.
Veur neuje uch hiej heel gaer veur oet!
C.V. De Kwekkerte Boekoel