Kuulköpkes
De Kuulköpkes - wie 't begós.
Toen in 1964 ’t gemeinsjapshoes “de Kamp” klaor woor, kreeg ’t verenigingslaeve oppe Boekoel eine grote impuls. Diverse luuj begóste mit ein klub, wovan “de Kamp”’ de toesbases waerde.
Ouch pesjtoor Coenen waas ein van die luuj. Hae zoog hiej ein kans ligke, om get te gaon doon veur de jeug, de tieners, vanne Boekoel. Hae vroog ein paar luuj om same mit hem de Tienerklub te beginne en hae vónj Piet en Mien Brouns, Sef en Trui Cox en Jan van Duin bereid om hem hiejbie te gaon helpe. Mer veurdet ze zo get begins höbs ze geldj neudig en daoróm waerde eers ein saort Fensie Faer gehaje. Oppe eerste daag, eine zaoterdig, raegende ’t wie ein bees en dao waerde nieks verdeend. Mer op zunjig sjloog ’t waer kompleet óm en de Boekoeler luuj kwome massaal nao ’t fees. Saoves bleek det d’r eine flinke cent verdeend waas. Toen kós begós waere mit de aktiviteite veur de Tienerklub op zonjigaovindj en det leep binnen de kórste tied al heel aardig. Toen de vastelaovindj van 1965 in zich kwoom, krege ein paar jóng maedjes van de Tienerklub al de kriebels. Ze wore te jónk veur de Kwekkertepool, mer zooge noe häör kans óm toch oppe Boekoel vastelaovindj te viere. Ze ginge alle zes nao pesjtoor en nao get aanhaaje ging pesjtoor Coenen veur de bijl. ’t Resultaat waas det in 1965 veur de eerste keer eine jeugvastelaovindj oppe Boekoel gehaaje waerde.
’t Eerste probleem waas eine naam veur de jeugvastelaovesvereniging. Det waas agendapuntj 1 in de eerste vergadering veur de vastelaovindj. Jan van Duin waas dao echter zo klaor mit. Jan, dae ’t Boekoels neet zo good meister woor, vonj det de nuuj vereniging “de jonge Kwakkerte “ mós heite. Det vonj ederein ein good idee, allein den waal op zien Boekoels. En zo waas de naam “de Kuulköpkes” gebaore.
De volgende vraog waas : “waem waerd noe de eerste jeugprins en waem lid vanne garde en Raod van èllef. De garde waas dudelik, want de maedjes die alles in gang haaje gezet, waerde oeteraard ouch alle 6 gardemaedje. De raod van èllef waerde oetgekaoze. Alle lede van de tienerklup móste sjtumme waem ze gaer biej de raod van ellef wólle höbbe en door die Raod waerde Fred Bóntje es eerste jeugprins gekaoze.
Noe móste de Kuulköpkes nag aangekleijd waere. De Kwekkerte haaje nag waal ein aad prinsepak, get mantjels en mötse, allein wore d’r gein pekskes veur de 6 maedjes. Gein nood, pesjtoor krege ze zo gek om mit häör nao Remunj te gaon en bie Elgozo, eine bekènde winkel oet dae tied, waerde get lep sjtóf gekoch. En mit behulp van Truus van Sjaek vanne Rao waerde door de maedjes zelf de eerste gardepekskes gemaak.
Wie jeugprins Fred oppe prinsebal oetkwoom, bleek ’t prinsepekske toch waal get groot en ein bietje versjlete te zin, dus sjakelde Jan van Bóntje gauw Anna vanne Rao in en die ervare nejster maakde nag veur de 3 dól daag ein prachtig nuuj prinsepak veur Fred.
De eerste jaore waerde gesjprónge en gedans op plate in eine zjoekbóks. Veur 1 kwartje kreeg ze toen 2 plate. Al gauw kwoom de jeug drachter det, wanneer ze èns flink sjtampsde taenge dae zjoekbóks, dezelfde plaat nag èns gedrejd waerde. Lekker goojekoup dus. Later waerde jaorelank de meziek verzorg door de prinsekepel.
Hoe ’t in ’t begin mit de optoch ging, is neet meer zo heel dudelik. Jeugprins Fred meint zich te herinnere, det d’r op eine outo-aanhenger mit de optoch mittróch. Waal is bekènd det d’r heel get prinsewages gebouwd zin in ein sjoon grote loods biej Joke en Har Bongaerts oppe Graeterbaan. Dao waas ’t lekker dreug en lekker werm.Wie dao gein plaats meer woor ging men nao ein aope loods bie Piet van Keup oppe Rao. En det veel taenge, want dit waas ein aope loods. Toen èns eine sjtraoljaeger gemaak waerde, waas ’t zo kaad, det de liem neet wilde dreuge. Of dae sjtraoljaeger ónger de optoch toen neergesjtort is, is neet bekènd.
Nao ein paar jaor waerde de prins neet meer gekaoze door de Raod van èllef, mer oetgezóch door ein paar besjtuurslede van de Tienerklub. En pesjtoor ging toen op vriedig veur de prinsebal de jeugprins vraoge. Toet de jeug det zelf in de gate kreeg. Ze ginge toen bie de kèrk inne sjtruuk ligke en es pesjtoor nao boete kwoom, ginge ze hem sjtiekem nao. Zo wiste ze vriedes al waem jeugprins ging waere.
De lèste jeugprins, dae door de Tienerklup oetgerope is, waas Harold Sonnemans. “t Jaor daoveur waas Harold zien vader, Ton, oetgerope es Kwekkerteprins en dae waas dus in die hoedanigheid in de Kuulköpkespool aanwezig wie Harold oetkwoom. Ton haaj Harold echter neet vertèld det d’r Kwekkerteprins waerde. Dus dach Harold: “ es mien vader mich neet zaet det d’r prins waerd, zègk ich hem ouch neet det ich jeugprins waer”. Geur kènt uch veursjtèlle, wie groot de ouge van Ton wore, wie d’r ziene zoon es jeugprins oet zoog kómme.
Dit waas ’t begin van de jeugvastelaovindj oppe Boekoel. Toet 1983 haet de Tienerklub de vastelaovindj georganiseerd. In al die jaore ginge d’r miense van de organisasie weg en dao kwome nuuje biej. Daonao is de organisasie euvergenaome door de aad-prinse vanne Kwekkerte. Det d’r noe, al veule jubileums later, nag altied door de Kuulköpkes vastelaovindj gevierd waert, höbbe v’r te danke aan al die luuj, die zich al die jaore vriewillig höbbe ingezat veur de jeug en de vastealovindj oppe Boekoel.
En de Kuulköpkes sjtaon neet sjtil. In 2013 is d’r ‘n eige Dansgarde opgerich. Dees Dansgarde haet in 2024 häör eerste jubelejum achter de rök. Auch is d’r in 2023 veur de eerste keer ‘n prinses oetgerope es veurgenger vanne Kuulköpkes in de persoon van Jewell Kirberg. Sins ‘t sezoen 2025 kènne alle kinjer van groep 6, 7 en 8 zich opgave veur de Kuulköpkes, toet dit jaor ware ‘t de kinjer oet groep 7, 8 en de brugklas. Biej de Dansgarde is ‘t zelfs zo det men hiej al van jongere laeftied aan kèn deilnaeme. Zo blief de vastelaovindj veur de Boekoelse jeug good in laeve!
