Gesjiedenis
Gesjiedenis vanne Aad-prinse
Oppe reunie van ‘t 33-jaorig besjtaon van c.v. de Kwekkerte in ’t naojaor van 1981 kwome de aad-prinse John 1e (John Clumpkens) en Pierre 1e (Pierre Eggels) toet de konklusie det eine aaftraejende prins meistal nao zien aaftraeje in ein deep gaat veel. Same mit de prins van det jaor Ton 2e (Ton Sonnemans) höbbe ze toen mit z’n drieje de köp biejein gesjtaoke om ‘ns te kieke waat dao aan te doon is. Ouch wólle ze waal ‘ns óngerzeuke of d’r ónger de aad-prinse interesse is óm door ’t jaor haer zo aaf en toe èns biejein te kómme. Dus waerde op 22 oktober 1981 de eerste vergadering van de aad-prinse oetgerope en waerde drek al heel get besjloete genaome.
Zo waerde aafgesjpraoke det alle aad-prinse (dus vanaaf 1949) de aad-prinse medalie kriege, de jóngste aad prins eder jaor de aaftraejende prins zal benumme toet “Ridder in de orde van dien veurgengers en mitbeheerder vanne Sjpèkkerkoele en de Haok”, de aad-prinse èlk jaor ‘n prinsemöts koupe veur de nuje prins, ouch de optoch door häör geregeld waert en óm toch ein bietje geldj in kas te kriege, jaorliks ein vriejwilige biejdrage waert gevraog aan de aad-prins óm ónger angere de prinsemöts te kènne koupe. ’T eerste “besjtuur” besjtóng oet veurzitter Ton Sonnemans, sikretaris Pierre Eggels en penningmeister John Clumpkens.
In dec. 1982 waerde besjlaote det de aad-prinse biej alle offisjele optraejes eine sjlupjas en ein prinsemöts drage en, ómdet de jeugvastelaovindj get organisatorische probleme haet, waert ouch besjlaote om ‘t regele van de jeugvastelaovindj vanaaf vastelaovindj 1983 van de toenmalige organisasie euver te numme.
In maart 1984 is Tila Hendrickx, de oetbaatster van ’t Kwekkertepelies, benump toet besjermvrouwe vanne Aad-Prinse en waert aad-prins Edmund 1e Schreurs sikretaris. Ouch waert in dees vergadering gesjtraeveld euver ’t get meer regele van ‘t prinsinwieje op zunjig nao de prinsebal.
In okt. 1984 waerd besjlaote det in de op te make sjtatute vanne Kwekkerte ónger angere opgenaome waerd det de aad-prinse door 2 man vertegewoordig waere in de Sjtichting c.v. de Kwekkerte.
Vanaaf de vastelaovindj 1986 hoofde v’r es aad-prinse geine jeugprinsewage zelf meer te bouwe, want v’r kriege d’r jaorliks eine gratis en veur nieks via Math Clumpkens.
Vanaaf 1989 kriege v’r zelfs via Math ein paar prinsewages veur de jeug gesjónke.
In nov. 1991 waert aad-prins Bert 3e Hendrikx de nuje sikkretaris en jaors drop aad-prins Jan 10e Bol de nuje peningmeister.
Meert 1992 waert biej de Zaobes ’t bördje “4 x 11 Plein “en ein zitbank onthult, beide es kado vanne aad-prinse veur ‘t 44-jaorig jubelejum vanne Kwekkerte. (De Zaobes is biej ‘t 3 x 11 jaorig jubelejum in ’t veurjaor van 1981 op de hook vanne Kèrkwaeg en Heikamp geplaats op initiatief van onger angere toenmalige jubeleujumprins Ton Sonnemans in samewèrking mit de gemeinte Zjwame en cv de Kwekkerte.)
14 November 1992 is d’r ’t eerste gezamelikke oetsjtepke, 11 jaor nao de eerste biejeinkóms. Mit ein grote bös waert de Hertog Jan Broewerie in Aarse bezóch.
7 Jannewari 1994 waert Pierre Eggels de nuje veurzitter. Op 16 jannewari 1996 waere de eerste offisjele
sjtatute opgemaak biej de notaris en dao in kriege de aad prinse de naam van : rechtspersoonlijkheid bezittende vereniging ”aad prinse c.v. de Kwekkerte”.
Op 18 december 1997 waert de vergadering van de aad-prinse veur de eerste keer gehaje in ‘t “sjtraevelhok” In dees vergadering nump Jan Bol veur 2 jaor ’t veurzittersjap euver, ómdet Pierre door sjtudie efkes get minder tied haet.
Begin 2003 kriege de Kwekkerte ‘n permanente verleechting op ‘t 4 x 11 Plein kado vanne aad-prinse biej häör 55-jaorig jubelejum.
Op de Bóntje Aovindj van 2005 traeje de aad-prinse veur de eerste keer op. Op bekènde meziek waere ’n 7-tal liedjes gezónge mit eige tekste. Ouch waert dit jaor door ein aantal aad-prinse veur de Kuulköpkespool ein sjitterend nuuj dekaor gemaak ónger begeleiding van Angela van aad-prins Jos 1e Sanders en gaon v’r dao veur ’t eers wèrke mit konsumpsiepenninge. Op de vergadering van 20 april 2005 waert besjlaote det d’r ein nuuj óngersjeijing kump: de vètlaere medalie. Dees kan oetgereik waere aan aad-prinse die get ekstraas gedaon höbbe veur oos klub of tiedes resepsies of dergelikke. Op de desembervergadering van 2005 nump aad-prins Robert 1e Claessen ’t sikkretariaat euver van Bert.
Begin 2007 waert eindelik ’n gooj sjtalling gevónje biej de femilie Vrenken in Heithuize veur oze aafgeloupe jaor volledig gerenoveerde jeugprinsewage. Op de novembervergadering van 2007 treujt Pierre Eggels aaf es veurzitter. Toet d’r eine nuje opvolger is gevónje, nump Jan Bol ’t veurzittersjap veurluipig waar.
Op 11 desember 2008 waert aad-prins Ron 1e Clumpkens benump es nuje veurzitter.
Op 29 april 2010 waert aad-prins Edmund 1e Schreurs de nuje penningmeister.