Gesjiedenis C.V. De Kwekkerte
C.V. de Kwekkerte is opgerich op 7 november 1948. Ein paar toneelsjpelers kwoom op de gedachte óm in eige dörp vastelaovindj te haje. Belangriek waas det d’r väöl lol en plezeer waerde gemaak, kleijer det kwoom zo nej neet, det kós altied later nag waal. De eerste Prins in 1949, Wiel I (van Cruchten), waerde ein aaj daeke ómgesjlage. De Prinsemöts waerde ‘t sjlegtersmötske van Sjamp, de sjlegter vanne Boekoel. Ómdet toen ederein eine euveral haaj, waerde det ’t eerste uniform van de Raod. Det waas toen waal nag mer ein Raod van Èllef van 7 persone, mer mit lol veur 12. ’t Programma ? Van kroeg nao kroeg. In dae tied waas det van Joep nao Sjlabbers Lei, den nao Maan en Doortje, weer nao Joep en zo mer door. ‘T klubhoes waas biej Joep en waerde ’t Kwekkertepelies genump.
’t Jaor daonao waerde de daeke vannne Prins vervange door ein gerdien, ’t sjlegtersmötske bleef, mer mit eine witte sjerp óm leek ’t al heel get meer. Ouch waerde d’r ein aantal eige gemaakde liedjes gezònge, wovan “Boekoel, o zo sjoon” toet op de daag van vandaag nag altied door edere Kwekkert, groot of klein, mit vastelaovindj mitgezónge waerd.
In 1951 kreeg men optochneiginge, al bleef ’t det jaor biej ’t róndjtrèkke vanne Prins in ein ker, getrokke door ein paerd. De Prins kreeg det jaor ein ech (geleend) Prinsepak en de Raod van Èllef besjtóng inmiddels oet 9 leje.
In 1952, inmiddels mit 11 raodsleje, waerde veur ’t eers nao de zaal van Wullem Maosse oppe Baove Boekoel gegange. Dae zaal kreeg de naam van Kwekkertepool en toet oppe daag van vandaag waerd dao nag altied de vastelaovindj gevierd. Ouch waerde in det jaor allerlei aktiviteiten gehaje om get geldj veur pekskes te verdene. Mer helaas, toen ’t geldj d’r woor, woor d’r ouch eine watersjnood in Zeelandj en waerde in 1953 alle vastelaovesaktiviteiten aafgelas. Waal waerde dit jaor de eerste vastelaovesgezet gemaak, al waas ’t neet meer es 1 gesjtenseld blaedje pepier.
In 1954 kreeg de Prins de eerste Prinsemöts, die kosde 48 gölje. En de jaore daonao waerde d’r sjteeds meer georganiseerd. Eine Prinsebal waerde gehaje, dao waerde aad iezer en fóddel opgehaold, nao oprichting van òs hermenie in 1956 kwoom d’r al gouw ein Prinsekepel en de dansmerietjes en eine nar (Har Knops) deje häör intraeje. En waat bliek : ouch noe nag haole de Kwekkerte nag al jaors aad iezer op, höbbe ze nag altied ein Prinsekepel en es ein van de weinige vereniginge ouch nag altied dansmerietjes, al waere die noe gardemaedjes genump.
In 1961 waerde de kefee van Joep, inmiddels van Sjaek en Mie, gesjlaote en vanaaf vastelaovindj 1962 waerde ’t Kwekkertepelies gevestigd in ’t kefee van Tila en Lei oppe Baove Boekoel. Dees kefee, noe van Ben en Carla, is nag altied de toeshave vanne Kwekkerte.
Begin jaore 60 leep de belangsjtèlling veur alle aktiviteiten langzaamaan truuk. ’t Jaor 1969 kwoom de ómsjlaag. Det jaor loog d’r zón diek pak sjnee, det nemes ’t dörp oet kós. Ederein ging nao de Kwekkertepool, jónk en aad. ’t Orkes meldje zich aaf, mer op eine geleende platesjpeler waerde ’t eine ónvergaetelikke vastelaovindj veur ’t hele dörp. De jeug haet zich toen zo good geammezeerd, det ze ouch de jaore daonao bleve kómme.
In de zestiger jaore waerde ouch kóntakte gelag mit vastelaovesvereniginge oet Zjwame, Azerao, Leewe en Neel. Later ouch nag mit Pesch bie Muunsje Gladbach.
In 1979 höbbe de Kwekkerte häör grutste reis oojt gemaak. De ganse vereniging mit get aanhang ging mit de boot nao Ingelandj óm in Londen ein vastelaovesfees op te loestere. Dit op oetneudiging van Annie en Frits, die dao woonde en bevrundj wore mit Prins Pierre I. Twee onvergaetelikke daag, wo nach jaore euver nao gekald is.
Halverwaege de tachetiger jaore waerde ein paar jaor achterein ein bezeuk gebrach aan de vastelaovesbal oppe Ingelse vleegbases in Elmp. Dao waerde de Kwekkerte mit ein bös haergebrach. Op ’t vleegveldj waas ’t oetsjtappe en drek de feeszaal in. Dao moogde ze pas oet wen de bös weer klaor sjtóng. Waarsjienlik wore die Ingelse bang veur sjpionaazje.
17 December 1984 waerde van de vereniging de “sjtichting c.v. de Kwekkerte” gemaak. Dao kwome offisjele statute en de vereniging waerd ingesjreve biej de kamer van Koophandel.
In 1996 waerde de eerste Prinseresepsie gehaaje en in 2009 höbbe de Kwekkerte zich aangesjlaote bij ’t SRV, de Samewerkendje Remunsje Vastelaovesvereniginge.