Kuulköpkes
Sten 1e, 5e jubelejumjeugprins vanne Kuulköpkes.
Geplaatst op: 18-01-2020 door Jack Schattorie
Kuulköpkes Boekoel besjtaon 5x11 jaor. Sten aan de Boom is zaoterdig 18 jannewarie in eine vólle Kuulköpkespool door Vors Ruben oetgerope es 5e Jubelejumjeugprins vanne Boekoel. Jeugprins wille waere, wèlke jóng wilt det noe neet?
Veurdet det zo wied waas höbbe veur zaoterdig eers same in de kirk ein sjoon dialekmès biejgewoond. Kwekkerte Prins Luc 1e (Pechtold), Hoeskwakerprins Nills 1e (van Heel) en toen nag Jeugprins Ruben 1e höbbe nag get veurlaeswerk gedaon. De meziek waerde verzorg door ós eige Prinsekepel. Ouch pesjtoor Crasborn en kirkbesjtuur weer bedank veur de mitwèrking!
Nao de Mis höbbe veur de mas biej de kirk ouch weer veurzeen van ein Kwekkertevlag. Daonao kós Ruben nag ein uurke in de Kuulköpkespool veurop loupe. Ós dansgarde verzorgde nag ein optraeje. Aad Prins Leo 3e waerde nag in ‘t zunke gezat, nao 22 jaor in ‘t besjtuur van de Kuulköpkes te höbbe gezaete sjtop hae d’r mit, bedankje op zien plaats. Óm 19:33 oer waerde Ruben óntdaon van alle prinselikhede. Zo geit det, der mót ‘ne nuje kómme! Gaer of neet gaer. De sjpanning waas groot, want kandidate genóg, die allemaol sjtónge te sjpringe óm jeugprins te waere, of kump der dit jaor veur t eers ein prinses? Haaj zo mer gekós in t jubelejumjaor!
De gerdiene ginge óm 20:11 oer aope. Ruben kondigde zelf ziene opvolger aan: ‘t Is, ‘t is, ‘t is Sten 1e. Sten, 11 jaor, zoon van Bianca Cluitmans en Wil aan de Boom. Sten zit in groep 8 van bazessjool St. Theresia oppo Boekoel. Hae handjbalt biej Hercules oppe Ruiver, duit väöl laeze en de res van de tied duit hae game op de kompjoeter en get kuite mit häöre hóndj Boaz. Zien mam, Bianca 45 jaor, wirk in verzorgingshoes te Bergh, in Berg, haet 7 jaor in de eljerraod van de bazessjool gezaete. Wil, 49 jaor, is es militaer al 9 keer oetgezónje gewaes nao ‘t boetelandj. Wil is ouch Adjudant, mer den es rang biej de Defensie Grondgebonden Luchtverdedigings Commando (DGLC). Wil is 22 jaor lid gewaes van de Raod van Elf van de Kwekkerte. Bianca en Wil höbbe zich in 2007 lere kinne mit de vastelaovindj, dus idder jaor is ‘t nao de 11e van 11e vastelaovindj biej Sten toes. Dao sjient nieks Baove de Beneje Boekoel te gaon ….
Sten haet twee adjudantes aan zien ziej: Noa Bongers (buurmaedje) en Lynn Parlevliet (zangpartner en sjoolvrindin). Nao Kuulkop, Kwekkerte-, Hoeskwakers- en 5x11 Jubelejummedalie kós ’t fees pas ech beginne! Sten haet ouch eine eige vastelaovessjlager “Kiek ins óm dich haer, de ganse pool vól Kuulköp!”. Dansgardes, groot en klein, veurde häör nuuj denskes van dit jaor op, sjiek! Es klap op de vuurpiel, veurde de Kuulköpkesraod ouch nag häör 5x11 Jubelejumleedje op “Noojt meer vastelaovindj , zónger ós” Sten zat same mit de disko en Prinsekepel de Kuulköpkespool oppe kop. Veur ‘t 5x11 jubelejumprogramma van Sten 1e, de Kuulköpkes en dansgarde verwieze veur uch nao de website van de Kwekkerte Boekoel.
2020 geit Sten veurop in de polenaes, en geit regere euver de Kuulköpkes, mit ziene sjpreuk: “Kuulkӧpkes 5 x 11, feeste geit vanzelf!” Boekoel Alaaf!
gesjiedenis Kuulköpkes
Geplaatst op: 21-12-2019 door Jack Schattorie
De gesjiedenis kins neet hersjrieve, daorom t sjtökske waat Aad Prins Pierre 1e in 2009 haet gesjreve ein bietje aangepas, 44 verangert nao 55. Pierre, ouch det höbs se good achtergelaote!
De Kuulköpkes - wie 't begós.
Toen in 1964 ’t gemeinsjapshoes “de Kamp” klaor woor, kreeg ’t verenigingslaeve oppe Boekoel eine grote impuls. Diverse luuj begóste mit ein klub, wovan “de Kamp”’ de toesbases waerde.
Ouch pesjtoor Coenen waas ein van die luuj. Hae zoog hiej ein kans ligke, om get te gaon doon veur de jeug, de tieners, vanne Boekoel. Hae vroog ein paar luuj om same mit hem de Tienerklub te beginne en hae vónj Piet en Mien Brouns, Sef en Trui Cox en Jan van Duin bereid om hem hiejbie te gaon helpe. Mer veurdet ze zo get begins höbs ze geldj neudig en daoróm waerde eers ein saort Fensie Faer gehaje. Oppe eerste daag, eine zaoterdig, raegende ’t wie ein bees en dao waerde nieks verdeend. Mer op zunjig sjloog ’t waer kompleet óm en de Boekoeler luuj kwome massaal nao ’t fees. Saoves bleek det d’r eine flinke cent verdeend waas. Toen kós begós waere mit de aktiviteite veur de Tienerklub op zonjigaovindj en det leep binnen de kórste tied al heel aardig. Toen de vastelaovindj van 1965 in zich kwoom, krege ein paar jóng maedjes van de Tienerklub al de kriebels. Ze wore te jónk veur de Kwekkertepool, mer zooge noe häör kans óm toch oppe Boekoel vastelaovindj te viere. Ze ginge alle zes nao pesjtoor en nao get aanhaaje ging pesjtoor Coenen veur de bijl. ’t Resultaat waas det in 1965 veur de eerste keer eine jeugvastelaovindj oppe Boekoel gehaaje waerde.
’t Eerste probleem waas eine naam veur de jeugvastelaovesvereniging. Det waas agendapuntj 1 in de eerste vergadering veur de vastelaovindj. Jan van Duin waas dao echter zo klaor mit. Jan, dae ’t Boekoels neet zo good meister woor, vonj det de nuuj vereniging “de jonge Kwakkerte “ mós heite. Det vonj ederein ein good idee, allein den waal op zien Boekoels. En zo waas de naam “de Kuulköpkes” gebaore.
De volgende vraog waas : “waem waerd noe de eerste jeugprins en waem lid vanne garde en Raod van èllef. De garde waas dudelik, want de maedjes die alles in gang haaje gezet, waerde oeteraard ouch alle 6 gardemaedje. De raod van èllef waerde oetgekaoze. Alle lede van de tienerklup móste sjtumme waem ze gaer biej de raod van ellef wólle höbbe en door die Raod waerde Fred Bóntje es eerste jeugprins gekaoze.
Noe móste de Kuulköpkes nag aangekleijd waere. De Kwekkerte haaje nag waal ein aad prinsepak, get mantjels en mötse, allein wore d’r gein pekskes veur de 6 maedjes. Gein nood, pesjtoor krege ze zo gek om mit häör nao Remunj te gaon en bie Elgozo, eine bekènde winkel oet dae tied, waerde get lep sjtóf gekoch. En mit behulp van Truus van Sjaek vanne Rao waerde door de maedjes zelf de eerste gardepekskes gemaak.
Wie jeugprins Fred oppe prinsebal oetkwoom, bleek ’t prinsepekske toch waal get groot en ein bietje versjlete te zin, dus sjakelde Jan van Bóntje gauw Anna vanne Rao in en die ervare nejster maakde nag veur de 3 dól daag ein prachtig nuuj prinsepak veur Fred.
De eerste jaore waerde gesjprónge en gedans op plate in eine zjoekbóks. Veur 1 kwartje kreeg ze toen 2 plate. Al gauw kwoom de jeug drachter det, wanneer ze èns flink sjtampsde taenge dae zjoekbóks, dezelfde plaat nag èns gedrejd waerde. Lekker goojekoup dus. Later waerde jaorelank de meziek verzorg door de prinsekepel.
Hoe ’t in ’t begin mit de optoch ging, is neet meer zo heel dudelik. Jeugprins Fred meint zich te herinnere, det d’r op eine outo-aanhenger mit de optoch mittróch. Waal is bekènd det d’r heel get prinsewages gebouwd zin in ein sjoon grote loods biej Joke en Har Bongaerts oppe Graeterbaan. Dao waas ’t lekker dreug en lekker werm.Wie dao gein plaats meer woor ging men nao ein aope loods bie Piet van Keup oppe Rao. En det veel taenge, want dit waas ein aope loods. Toen èns eine sjtraoljaeger gemaak waerde, waas ’t zo kaad, det de liem neet wilde dreuge. Of dae sjtraoljaeger ónger de optoch toen neergesjtort is, is neet bekènd.
Nao ein paar jaor waerde de prins neet meer gekaoze door de Raod van èllef, mer oetgezóch door ein paar besjtuurslede van de Tienerklub. En pesjtoor ging toen op vriedig veur de prinsebal de jeugprins vraoge. Toet de jeug det zelf in de gate kreeg. Ze ginge toen bie de kèrk inne sjtruuk ligke en es pesjtoor nao boete kwoom, ginge ze hem sjtiekem nao. Zo wiste ze vriedes al waem jeugprins ging waere.
De lèste jeugprins, dae door de Tienerklup oetgerope is, waas Harold Sonnemans. “t Jaor daoveur waas Harold zien vader, Ton, oetgerope es Kwekkerteprins en dae waas dus in die hoedanigheid in de Kuulköpkespool aanwezig wie Harold oetkwoom. Ton haaj Harold echter neet vertèld det d’r Kwekkerteprins waerde. Dus dach Harold: “ es mien vader mich neet zaet det d’r prins waerd, zègk ich hem ouch neet det ich jeugprins waer”. Geur kènt uch veursjtèlle, wie groot de ouge van Ton wore, wie d’r ziene zoon es jeugprins oet zoog kómme.
Dit waas ’t begin van de jeugvastelaovindj oppe Boekoel. Toet 1983 haet de Tienerklub de vastelaovindj georganiseerd. In al die jaore ginge d’r miense van de organisasie weg en dao kwome nuuje biej. Daonao is de organisasie euvergenaome door de aad-prinse vanne Kwekkerte. Det d’r noe, 5 x 11 jaor later, nag altied door de Kuulköpkes vastelaovindj gevierd waert, höbbe v’r te danke aan al die luuj, die in die 55 jaor zich vriewillig höbbe ingezat veur de jeug en de vastealovindj oppe Boekoel.
Programma Kuulköpkes
Geplaatst op: 21-12-2019 door Jack Schattorie
Zunjig 29 december 2019.
Ós 5x11 jubelejumliedje oefene biej Aad Prins Ron 1e (Clumpens) toes, door Raod en Dansgarde “Groot”. Biejeinkómme óm 18:33 oer. Inj óm óngeveer 19:55 oer.
Vriedig 3 jannewarie.
Raod en Dansgarde “Groot” 5x11 jubelejumliedje opnumme biej Studio Difference in Weert, vertrèk Kwekkertepelies (kefee Soranus) 17:55 oer, veur probere veur 20.33 oer truuk te zin. Veur gaon mit eige verveur. Aansjloetend Pekske aafhaole, óm 20:33 oer in het Kwekkertepelies (Kefee Soranus).
Zaoterdig 11 jannewarie.
Bezeuk Raod aan de Prinsebal vanne Kwekkerte in de Kwekkertepool. Biejeinkómme óm 20.33 oer aan ’t Kwekkertepelies (kefee Soranus). Inj óm óngeveer 22:55 oer.
Vriedig 17 jannewarie.
Prins(es) oetrope van de Hoeskwakers. Raod Biejeinkómme óm 19:55 oer Kwekkertepelies (kefee Soranus). Den gaon veur same mit de Kwekkerte nao de Hoeskwakersbal in de Kwekkertepool (Hermeniezaal). Aafgeloupe veur de Kuulköpkes óm óngeveer 22.22 oer.
Zaoterdig 18 jannewarie.
17:33 oer Jubileum 5x11 Vastelaovesmès in de Theresiakèrk. Aansjloetend 5x11 Jubileum Jeugprinsebal in de Kuulköpkespool (jeughoes de Kamp). Biejeinkómme Raod en Dansgarde óm 17.11 oer aan de Kamp. Jeugprinsebal is aafgeloupe óm 21:55 oer.
Maondig 20 jannewarie.
17:00 oer Jeugprinsefotoos make mit zien Adjudante, aansjloetendj groepsfoto alle Prinse en adjudante van de Kwekkerte en Hoeskwakers. Biej Aneta Martens in de studio.
Zaoterdig 25 jannewarie.
Groepsfoto make biej Aneta, Dansgarde (13:00 oer) en jeugraod (13:25 oer). Aansjloetend nao ’t Vastelaoves-jeug-treffe van de Veldjmuus in Remunj. Truuk óm óngeveer 17:33 oer.
Zunjig 2 fibberwari.
Onthulling 5x11 Kuulköpkespool biej de Sjpik. Biejeinkómme in de kefee van ’t Kwekkertepelies óm 13.33 oer. Den laope veur same nao DE pool. Van dao-oet gaon veur nao “Kuulköpkes got Talent” middig.
Zunjig 2 fibberwari. Kuulköpkes got Talent
Bezeuk Raod en Dansgarde aan 5x11 jubbileum jeugmiddig. 14:11 – 17:22 oer. Waem is t beste Talent van de Boekoel? Artieste komme en gaon. Ein en anger waerd in gooi bane geleid door Martin Krabee en paparatzia Wendy. Dansgarde jongk en get aajer, Mieke en Bjorn, Sjagers Kuulköpkes door de jaore, 5x11 jubileumleedje, enz ….Os Artieste waere beoordeeld op heur könne door ein vakundige sjurie: Nick Simons, Ali D en Anouk. Tösse de akts door is der vanalles en nog get te doon. Ammusatie door eine ballonne Klown, gratis sjmienke, gratis sjnoepzäkske make in osse sjlökkraom, gratis ships biej inlevering van de vastelaoves top 3 veur de top 11 2020, zelf plaetjes dreije, enz. enz. enz.
Zaoterdig 8 fibberwarie(ónger veurbehoud)
Bezeuk “Kleine” Dansgarde aan de vastelaoves middig van de bejaarde van Amaliahof Zjwame.
Zaoterdig 15 fibberwarie.
11:33 oer Trompetter foto make, café de Breer in Remunj. Hiej geit allein de Jeugprins mit zien Adjudante, Kwekkerte Prins en Vórs van de Kwekkerte Bjorn nao toe.
Zónjig 16 fibberwarie.
Bezeuk Raod en Dansgarde aan de prinseresepsie in ’t Kwekkertepelies. Biejeinkómme in de kefee van ’t Kwekkertepelies óm 13.55 oer.
Dinsdig 18 fibberwarie.
Groot Nederlands Prinsentreffen in Remunj, Vertrekke biej Ben en Carla om 19:11 oer. Hiej geit allein de jeugprins, vors en eventueel adjudante nao toe onger begeleiding van Vórs Bjorn van de Kwekkerte.
Woonsdig 19 fibberwarie. Wins van de Prins:
Raod en Dansgarde “Groot” bringe ein bezeuk aan de vastelaovesdisco van Handjbalvereniging Hercules Ruiver (Sten deut dao handjballe), vertrèk Kwekkertepelies (kefee Soranus) 17:55 oer, truuk óm 20.33 oer.Veur gaon mit eige verveur.
Vriedig 21 fibberwarie. (programma ónger veurbehoud)
Vastelaovindj vanne sjool in ’t jeughoes, van 9:44 toet 12:33 oer. Allein de Jeugprins, Adjudante en Vórs Ruben doon hiej aan mit in uniform. Optraeje Dansgarde in eige vastelaoves kleijer.
Zaoterdig 22 fibberwarie.
Sjleuteleuverdrach in Remunj, Vertrekke biej Ben en Carla om 9:11 oer. Hiej geit allein de jeugprins en adjudante nao toe onger begeleiding van Vórs Bjorn van de Kwekkerte.
Optoch Zónjig 23 fibberwarie.
Dansgarde haet vandaag gein programma. Biejeinkómme Raod óm 13.55 oer biej Aad-Prins Pierre 2e (van Deur)
Maondjig 24 fibberwarie.
Vanaovindj hosse en sjpringe in de Kuulköpkespool. Veur beginne Raod en Dansgarde óm 17.33 oer. Róndj 19.33 priesdanse. De aovindj sjtop óm 20.22 oer.
Dinsdig 25 fibberwarie.
Sjmiddes get aete biej de Jeugprins. Biejeinkómme óm 16:22 oer biej de jeugprins toes. Dit aete doert toet 17:22 oer, wonao veur rechsjtreeks nao de Kuulköpkespool gaon. 5x11 Aafsjloetbal, veur beginne Raod en Dansgarde óm 17.33 oer. Optraeje Miesjke +/- 19:11. Óm 20.22 oer sjloeting vanne 5x11 jeugvastelaovindj 2020 door de Jeugprins.
Sjoone Vastelaovindj Same!