't Kwekkerte nuujs vanne Boekoel!
Paul Schobben nuje prins bie CV De Kwekkerte Boekoel!
Geplaatst op: 10-01-2015 door Kim Vervoort
Zaoterdig 10 jannewarie waerde in eine toet ’t daak toe gevulde Kwekkertepool Prins Paul I oetgerope es 66ste Prins vanne Kwekkerte. Prins Paul I kwoom toet idders grote verbazing oet ‘n geweldig decór nao veure en ging d’r aan wie eine dólle óm d’r dit jaor ein sjpektakel van te make! Hie geit d’r same mit zien vruike Marleen en zo wie ze zelf zègke “ózze kleine’’ van 1,98 maeter zoon Axl en aad-vors Ben Deckers es adjudante zien bès veur doon!! Dit duit Prins Paul I mit zien eige sjpreuk mer waat eigelik veur bienao ’t hele 4- tal geldj!!
Neet es Kuulköpke gebaore toch eine Kwekkert gewaore!!!
Paul is gebaore op de spekhei in Kirchraoj en naodet hae zien hele middelbaresjool bie ’t knapste maedje van de sjool Marleen in de klas haet gezaete vroog d’r ‘m de aller lèste sjooldaag op ein sjoolreisje in London of ‘t verkering mit ‘m wol! En ’t zei gelökkig jao! Haopelik haet d’r es prins minder las van faalangst… Nao 2 jaor in Zjwame gewoond te höbbe zin ze in ’88 nao de Boekoel verhoes. Toet op de daag van vandaag wone ze dao heel gaer en kwaam dit jaor eindelijk de kans op prins van heur geleefde dörpke te waere. Ein kleine wins van heur waerde waor! En get sjoners es de kleine zoon wat ‘m op de kop kiek es adjudant höbbe besjteit neet!
Prins Paul I is wèrkzaam op ’t Service Centrum biej de politie in Venlo. Voetballe waas 14 jaor lang ein hobby omdet d’r den zónjigmorge op de bank kós oetrusten van de wilj nach sjtappe en neet omdet d’r zo good kós voetballe! Naodet Paul in de zomer van 2013 waeges zien gezondjheid mós sjtoppe mit rouke is hae op de wielrenfiets gestap óm zien laeve te baetere en óngertusse haet hae ‘t heel gezin besjmet mit ‘t wielrenvirus. Dees gezondjheid zólle ze de kómmende tied hel neudig höbbe om Prins Paul I biej te haaije!!
Prins Paul I en CV De Kwekkerte neudige uch oet op ein van ós aktiviteite wat op ‘t programma sjtaon. kiek veur meer info op www.kwekkerteboekoel.nl en bön d’r biej!
Wilt geur ózze prins en zien gevólg ein hendje kómme gaeve den zit geur biej deze van herte oetgeneudigd op zien eige Prinse resepsie op zónjig 8 fibberwarie a.s vanaaf 14.44 oer.
Vastelaovindj same,
CV de Kwekkerte Boekoel
Sef van Buggenum ere-medalie
Geplaatst op: 28-02-2014 door Kim Vervoort
Sef van Buggenum ere-medalie
Aafgeloupe zónjig tiedes de prinseresepsie van ZDH Prins Roel I höbbe v’r, veur de eerste keer, de Sef van Buggenum ere-medalie oetgereik. Ein medalie die bedoeld is veur miense die zich gedoerende ein lange periode ontzettend hel en mit väöl iefer höbbe ingezat veur de gemeinsjap en in ’t bezónjer de vastelaovindj. Persone, zo wie ós erelid Sef van Buggenum waas.
Zónjig höbbe v’r dees medalie oetgereik aan drie bezónjere miense, Piet Maessen, Huub Brouns en Pierre van Deur. Piet Maessen waas prins in 1972, jaorelangk veurzitter biej versjillende vereiniginge oppe Boekoel, mede-oprichter van de Prinsekepel en maker van de wereldberoemde film euver de Boekoel. Daonaeve waas Piet betrókke biej de doorsjtart van de Kuulköpkes in 1983. Huub Brouns waas prins in 1977 en is net wie Piet, jaorelangk veurzitter en sikkertaris gewaes biej diverze vereiniginge oppe Boekoel. Huub waas oprichter van ‘t Truupke in 1978 en zoot in de kemissie die d’r veur zorgde det veur nuuj rame inne kerk krege. Pierre van Deur waas prins in 1987, 10 jaor langk veurzitter biej de jeugd van de voetbalklup. Sjpeelt al meer den 40 jaor biej de hermenie dao is d’r besjtuurslid en sikkertaris van de stichting uniforme. Daonaeve is Pierre meer es 30 jaor lid gewaes van de prinsekepel en aaf en toe sjpeelt d’r dao nag waal èns ‘n sjtökske mit.
Laot dees drie here ein veurbeeld zin veur idderein waat de Boekoel leef haet!
Sef van Buggenum ere-medalie
Geplaatst op: 19-02-2014 door Kim Vervoort
In de lèste paar maondje van 2013 is biej ós ’t idee ontsjtange óm ein medalie te laote make, ein medalie óm bepaolde miense te ongersjeije. Persone die zich gedoerende ein lange periode ontzettend hel en mit väöl iefer höbbe ingezat veur de gemeinsjap en in ’t bezónjer de vastelaovindj. Persone die de vereiniging, waat veur Boekoelse vereiniging den ouch, op de kaart höbbe gezatte binne en boete ‘t dörp, die es lid van de gemeinsjap Boekoel zich oetzónjerlik verdeenstelik höbbe gemaak veur deze gemeinsjap en miense die de vastelaovindj oppe Boekoel dermate besjermp en/óf bevorderd höbbe. Persone zo wie ós ere-lid Sef van Buggenum, dae helaas neet meer ónger ós is, mer dae aafgeloupe dezember nag es állereerste ós jubelejummedalie haet mooge óntvange, dae zich ein enorm lange periode haet ingezatte veur diverze vereiniginge oppe Boekoel en in ’t bezónjer veur de vastelaovindj. Veur höbbe den ouch aafgeloupe jaor, biej ’t ontsjtaon van de ideeje euver dees medalie, in euverlik mit de femilie van Sef, besjlaote dees medalie nao Sef te vernumme.
