't Kwekkerte nuujs vanne Boekoel!
Bedank!
Geplaatst op: 16-02-2018 door Juul
Names Prins Bart, mer zeker ouch names C.V. de Kwekkerte wille veur gaer idderein van herte bedanke waat op waat veur meneer den ouch ein biedrage haet geleverd aan deze geweldig sjoone vastelaovindj!
Idders keer op nuuj kènne veur geneete van grote getale miense die op ós aktiviteite aafkómme. De eerste Verrückte Samstag waas drök bezóch, en veur kènne uch al vertèlle det veur kómmend jaor 't program ouch al rondj is. Vanaaf de prinsebal toet en mit gister bie de aafsjloeting, kènne veur allein mer sjpraeke euver verbroedering, jónk en aad, de ganse zaal sjteit vól. Sjitterend om te zeen wie det de vastelaovindj oppe Boekoel laef! Bedank!
Veur zeen uch gaer kómmend sezoen weer truuk!
Bedank!
Sef van Buggenum ere medalie
Geplaatst op: 05-02-2018 door Kim Vervoort
Gister, tiedes de prinseresepsie van Zijne Dorstlustige Hoogheid Prins Bart I höbbe veur de Sef van Buggenum ere-medalie oetgereik.
Ein medalie die bedoeld is veur miense die zich gedoerende ein lange periode ontzettend hel en mit väöl iefer höbbe ingezat veur de gemeinsjap en in 't bezónjer de vastelaovindj. Persone, zo wie ós erelid Sef van Buggenum waas.
Dees medalie höbbe v'r tiedes de Prinseresepsie oetgereik aan eine bezónjere miens, Ger Sanders. Ger is vanaaf 1977 lid van handjbaogvereiniging Soranus, sinds 1993 zit d'r dao in 't besjtuur, en vanaaf 1994 vervult d'r zien taak es penningmeister. Vanaaf 2009 is d'r ouch nag besjtuurslid van handjbaogbondj Gezellig Samenzijn. Mit Soranus haet d'r jaorelangk deil genaome aan de optoch, en vreuger woor d'r lid van Joekskepel Naatje Pet en later nao biej Nag Efkes, zo kump d'r al jaore lang op väöl van ós aktiviteite.
In de tied det veur oppe Boekoel nag oktoberfeeste haaje, zoot Ger dao vanaaf 1986 toet 2003 in 't besjtuur. Van 2011 toet 2014 woor d'r lid van 't kerkbesjtuur en taegeweurdig is hae nag altied vriewilliger veur de kerk.
Weer ein veurbeeld van emes dae Boekoel leef haet, laote veur trots zin op miense wie Ger.
Prins Bart I
Geplaatst op: 06-01-2018 door Kim Vervoort
Prins Bart I nuuje veurgenger biej CV De Kwekkerte Boekoel!
Aafgeloupe zaoterdig is Bart Munnichs oetgerope es nuuje Kwekkerteprins. Naodet zienne veurgenger Prins Juul I euveral waas gewaes om aafsjied te numme en waas ontroond, waerde d'r opgenaome bie de Aad-Prinse. Wie de deure veur 't podium weer aope ginge waas 't decór omgebouwd nao eine heuse jungle. Daomit waerde 't startsjot gegaeve veur 't thema van dit jaor jungle fever! Prins Bart I stormde nao veure toe en geliek waas duudelik det hae d'r heel väöl zin in haet!!
Wie d'r zienne speech mit lichte zenuwe vertèlde maakte d'r zelf zien adjudante bekint! Sjoerd van Deur en Rochér Lamers. 2 gooj vrunj van hem die waal weite wie se ein feesje mós bouwe! Veur zin d'r den auch van euvertuug det zie 3 same dit jaor d'r get van gaon make! Wie de neudige wäörd gesjpraoke wore en 't 3 tal de microfoons greep knalde ze de nuuje prinsesjlager de zaal in wo Prins Bart I zelfs nog get zangles veur haet gekrege van Rochér.
De sjpreuk van Prins Bart I is gerelateerd aan zien werk es monteur. Veur gaon 't make!!
Bart is getrouwd mit Kelly van Hansje van de rao en same hubbe ze eine zoon Dax. Werkzaam biej Smurfit Kappa Roermond Papier es mechanisch onderhouds monteur. En al 13 jaor lid van De Kwekkerte wo d'r toet aafgeloupe juni veurzitter is gewaes. Oppe zónjigmorge sjpeelt hae een putje voetbal bie VV Boekoel en geit mit enige regelmaot nao de sjportsjool zodet hae auch in 't prinsepak pas.
ZDH Prins Bart I en C.V. De Kwekkerte zeen uch heel gaer truuk tiedes deze vastelaovindj!! Haaj de sociale media in de gate veur alle sjoon aktiviteite die kómmend sezoen gaon plaatsvinje! Veur höbbe weer ein paar geweldige daag in 't veuroetzich!
Op zónjig 4 fibberwarie zit g'r vanaaf 14:44 van herte oetgeneudigd op de Prinresepsie van ZDH Prins Bart I en zien gevolg.
Veur gaon 't make!!