't Kwekkerte nuujs vanne Boekoel!
Bedank!
Geplaatst op: 10-02-2016 door Kim Vervoort
Names Prins Thijs I mer zeker ouch names C.V. de Kwekkerte wille veur gaer idderein bedanke dae op waat veur meneer den ouch ein biedrage haet geleverd aan deze geweldig sjoone vastelaovindj. ’t Belaofde van te veure al ein heel kort sezoen te waere, en es veur noe vandaag dao op truuk kieke, is kort mer krachtig de innigste meneer om dit sezoen te ómsjrieve! Ein sezoen wo in veur waal weer emes de Sef van Buggenum ere-medalie oet höbbe moge reike. Die medalie die bedoeld is veur miense die zich gedoerende ein lange periode ontzettend hel en mit väöl iefer höbbe ingezat veur de gemeinsjap en in ’t bezónjer de vastelaovindj. Tiedes de prinseresepsie höbbe veur dees medalie oetgereik aan Bert Rutten. Bert, sinds 1978 biej zo good es alle aktiviteite van de Kwekkerte aanwezig gewaes, haet zich bezónjer nuttig gemaak in de Boekoelse vereinigingswereld. Jaore lang haet d’r zich veur de gemeinteraod in Zjwame ingezatte en zoot d’r in ‘t besjtuur biej de voetbalklup, biljaarklup en de hermenie. Daobiej is d’r ouch binne die vereiniginge biej diverze jubilea kemissies betròkke gewaes. Weer ein veurbeeld van emes dae Boekoel leef haet, laote veur trots zin op miense wie Bert.
Gaer zeen veur uch vanaovindj nag eine keer truuk tiedes ‘t hering sjèlle en anges biej de sjtart van ‘t volgend sezoen! Bedank!
De 33 jäörige Thijs I Thissen Kwekkerteprins 2016!!
Geplaatst op: 09-01-2016 door Kim Vervoort
Zaoterdig 9 jannewarie waerde Thijs I oetgerope es nuuje heerser van ’t Kwekkerteriek Boekoel. Naodet aafsjied waas genaome van zienne veurgenger Aad Prins Paul I waerde ‘t pas ech sjpannend! Wie einmaol de deure waerde geäöpend kwaam ederein terech in eine grote kleijerwinkel en nome de Kwekkerte uch mit op een ontdèkkingsreis nao de nuuj uniforme vanne Raod van Ellef en Prinsekepel. Geheel onverwachs kreeg de complete vereiniging nuuj uniforme. Dit, omdet veur den nag sjterker en completer veur de daag kènne kómme! Wie einmaol de rouk waas opgetrokke waerde ’t tied veur de grootste sjter van de aovindj bekènd te make! Naodet ouch Prins Thijs I een nuuj prinsepak haaj gescoord en det aangetrokke haaj in ‘t pashökske op de buun waerde hae geprizzenteerd es 67ste Kwekkerteprins.
Prins Thijs I zal dit sezoen regere mit zienne sjpreuk: “Laot gaon”!
Thijs is getrouwd mit Mieke en is vader van Teun en Lot. Wie in een ech sprookjeshuwelik wonen ze same in kasjteel ‘t Sjpik oppe Rao in Boukoul. Thijs vintj ‘t geweldig om get te klómmele op zien Sjpik, want dao is tensjlotte altied waal werk. Daonaeve is Familie Thissen zeer muzikaal. Mieke sjpeelt biej de hermenie oppe Boukoul en Thijs is gitaris in een bendje. Veur een gooj partie skwasj drejt ozze Prins de henj neet om. In 1995 waas hae al ‘ns Jeugprins van De Kuulköpkes.
Zien 2 adjudante die veur ’t eers in de Boekoelse gesjiedenis in een ludiek uniform rondjloupe zin Guido Vintcent en Aad Prins Ton III Simons. Wie ze zellef zègke is Guido heel henjig en kreatief mit kompjoeters en facebook, en Ton doorgewinjterd (al de 3e keer) adjudant. Mit die sjteun mót ’t gein probleem zin om de vastelaovindj door te trekke.
Prins Thijs 1ste en CV De Kwekkerte zeen uch heel gaer trök op ein activiteit binnekort. Kiek veur meer info op kwekkerteboekoel.nl en bön d’r biej!!
Wilt geur ozze prins en zien gevolg een hendje kómme gaeve of zit g’r benuujd nao os nuuj uniforme, den zit geur biej deze van herte oetgeneudj op ozze Prinseresepsie op zónjig 31 jannewarie vanaaf 14.44 oer.
Laot gaon!
CV De Kwekkerte Boekoel
Sef van Buggenum ere-medalie
Geplaatst op: 08-02-2015 door Wil aan de Boom
Aafgeloupe zónjig tiedes de prinseresepsie van Zijne Dorstlustige Hoogheid Prins Paul I höbbe veur de Sef van Buggenum ere-medalie oetgereik.
Ein medalie die bedoeld is veur miense die zich gedoerende ein lange periode ontzettend hel en mit väöl iefer höbbe ingezat veur de gemeinsjap en in ’t bezónjer de vastelaovindj. Persone, zo wie ós erelid Sef van Buggenum waas.
Zónjig höbbe v’r dees medalie oetgereik aan eine bezónjere miens, Frits Eggels. Frits waas vanaaf 1994 reeds deilnömmer en animator van ‘t carnavalsklupke CV 14, die idder jaor mit get nuujts mitdeeje aan de optocht oppe Boekoel en truuk te vinje zin op vastelaoves maondig in de kwekkertepool. Ouch is d’r lid van de voetbalklup, vv Boekoel sins 1 juli 1958 en sins 2008 is d’r dao erelid.
Veur die voetbalklup waas Frits aktief es jeugleider (1964-1974 / 1975-1983 / 1985-1989) , veurzitter (1965-1994) en sikretares/sentefoekser (6 jaor) van ‘t jeugbesjtuur, leider van ‘t eerste en derde èlftal biej de seniore. Ouch boete get mit de bal, duit der ouch get names” de neet op zónjig ploog “ vanaaf 2003 toet noe toe. (terrein onderhaad). Ouch is d’r meerdere keere ondersjeije door de KNVB/NKS mit de spelde in Zilver,goud en Blauw mit Leeuw.
Hae waas veurzitter van de jeug soos “t kelderke” van 1968-1970.
En ouch is d’r al meer den 40 jaor donor biej de bloedtransfusie deens.
Weer ein veurbeeld van emes dae Boekoel leef haet, laote veur trots zin op miense wie Frits.